Turizmu Natureza

Bee Tuda Sakalai Liu 

Bee Tiris Sakalai Liu hanesan Bee Tiris ida ne'ebé aas liu iha posto administrativu Laga, munisípiu Baucau ho ninia naruk 28 metru tuir dadus ekipa USJTL (Unidade Sientista Jeolojia Timór Leste). Bee Tiris Sakalai Liu lokaliza iha suku Sagadate, aldeia Na'afa. Liafuan Sakalai Liu mai husi lian makasae, "Sakalai" katak manu andorinhas no "Liu" katak bee nalihun. Tuir istoria beiala bizavo sira hateten katak manu sakalai (manu metan) mak hetan bee tiris ne'e. Iha loron ida manu metan ne'e semo hodi ba hemu bee iha fatin neba, no bei ala sira sempre hetan manu ne'e ninia isin lolon bokon hela deit, no loron ida beiala sira hakarak atu hatene nusa mak manu ne'e nia liras sempre bokon hela deit. No iha tempu tuir mai beiala sira lao tuir manu metan ne'e, no to iha fatin neba sira hetan bee tiris ne'e. bainhira to iha bee tiris neba beiala sira la hatene bee ne'e nia naran maka sira haran bee ne ho naran sakalai liu.

Atividade ne'ebé mak ita bele realiza iha fatin ne'e mak hanesan ita bele haree view ne'ebé mak kapas no furak tebes iha fatin ne'e, no aihoris sira ne'ebé halo matak fatin ne'e. Bee ninia moos no nia aas atrai tebes ema atu hassai foto no haris.

 Bee Tuda Tarumiliu

Tarumiliu hanesan fatin natureza ida ne'ebé lokaliza iha munisípiu Baucau, posto administrativu Laga, suku Sagadate, aldeia Abuti ho suku Atelari nia klaran. Husi suku Sagadate ba visita Bee Tudak Tarumiliu ho distansia 5 km. Bee Tudak Tarumiliu hanesan potensia turismu natureza ne'ebé iha nia karateristiku uniku hanesan bee ne'ebé naruk tebes iha suku Sagadate. No iha bee nia laran iha ikan, boek no tuna. Liafuan Tarumiliu mai husi lian makasae "tarum" katak hakoi no "liu" katak mota. Mota ne'e hanaran Tarumiliu tanba iha tempu uluk iha joven ida mak monu tama iha bee nia laran, no nia isin buka la hetan, tuir istoria katak mota ne'e mak hakoi tia joven ne'e. Fatin ne'e uluk ema hanaran mota deit, depois joven ne'e monu iha laran maka komunidade sira iha ne'eba hanaran fatin ne'e Tarumiliu. Bee Tudak Tarumiliu ninia hun mai husi foho matebian no liu husi rai ida naran Lafateri no to iha Laivai. Fatin refere iha ona ema barak maka mai vizita hanesan turista lokal no turista estranjeiru, no aktividade ne'ebé mak turista sira halo iha fatin ne'e mak hanesan haris, hasai foto no nani.

Bee Tuda Bailawaliu

Bee Tudak Bailawaliu lokaliza iha munisípiu Baucau, posto administrativu Laga, suku Sagadate, aldeia Abuti ho suku Atelari nia klaran. Bailawaliu hanesan Bee Tudak ne'ebé natureza no ninia lokalizaun besik mos iha Bee Tudak Tarumiliu nia leten. Liafuan Bailawaliu mai husi lian makasae katak mota fahi fuik. "Bailawa" katak fahi fuik no "liu" katak mota. Tuir istoria beiala sira konta katak bee ne'e hanaran Bailawaliu tanba hodi habosok labarik ki'ik sira ho fahi fuik atu nune'e sira la bele ba haris iha mota ne'eba, ho razaun tanba mota ne'e naruk no avo sira tauk wainhira labarik ki'ik sira ba haris iha ne'eba bele hetan dezastre hanesan mout ka mate iha ne'eba ho razaun hirak ne'e avo sira habosok labarik sira ho fahi fuik barak, karik labarik sira ba haris iha ne'eba fahi fuik sei tata. Ho razaun hirak ne'e maka mota ne'e avo sira hanaran Bailawaliu. Atrasaun uniku husi fatin ne'e maka ninia bee ne'ebé mos matak no haleu husi fatuk, I no mos wainhira atu asesu ba to'o iha fatin refere ita tenke liu husi dalan "tracking". Atividade ne'ebé mak bele halo iha fatin refere mak haris, hasi foto no "tracking".

Mota Kaidawalaliu

Mota Kaidawalaliu hanesan potensia turizmu natureza ne'ebé furak tanba bee ne'ebé kor matak ho mos. Kaidawalaliu lokaliza iha munisípiu Baucau, posto administrativu Laga, suku Sagadate, aldeia Abuti ho suku Atelari nia klaran. Mota Kaidawaliu nee foin konesidu iha tinan 2017 no uluk mota nee nalihun babain hela no lanaruk no iha fatuk boot ida iha klaran, maibe tanba udan boot mai halo fatuk boot nee lakon iha mota laran no mota nee sai naruk. Mota nee naran kaidawaliu razaun tanba iha mota nee nia sorin iha ai-dak nia hun boot ida iha ne'eba, ho nunee sira tau mota ne'e nia naran Kaidawaliu. Kaidawaliu mai husi lian makasae "kaidawa" katak ai-dak no "liu'" katak mota.

 Bee Tuda Taukauliu

Taukauliu hanesan potensia turismu natureza ne'ebé lokaliza iha munisípiu Baucau, posto administrativu Laga, suku Sagadate, aldeia Samagata. Bee Tudak Taukauliu sai hanesan bee ne'ebé importante tebes ba komunidade aldeia Samagata no mos ba iha suku Sagadate, tanba maioria komunidade sira ba haris, fase roupa iha ne'eba ho razaun tanba besik no la naruk. Liafuan Taukauliu mai husi lian makasae katak bee nalihun ki'ik ho modelu nu'u nia kakuk. "Tau" katak nu'u nia kakuk, "kau" katak ki'ik no "liu" katak bee nalihun. Razaun bee ne'e hanaran Taukauliu tanba bee ne'e nia modelu hanesan nu'u ninia kakuk maka beiala sira hanaran Taukauliu. Aktividade ne'ebé ema halo mak hanesan haris hasai foto. No dalan atu asesu ba iha ne'eba fasil tanba besik iha Estrada.